धाराशिव: जिल्हा परिषदेच्या सार्वत्रिक निवडणुकीनंतर आता अध्यक्ष आणि उपाध्यक्ष निवडीचा बिगुल वाजला आहे. जिल्हा प्रशासनाने जाहीर केल्यानुसार, येत्या १३ मार्च २०२६ रोजी दुपारी २:०० वाजता जिल्हा परिषद सभागृहात विशेष सभा पार पडणार असून, याच दिवशी जिल्ह्याला नवे नेतृत्व मिळणार आहे.
निवडणुकीचे महत्त्वाचे टप्पे:
- अर्ज दाखल करणे: सकाळी १०:०० ते १२:०० वाजेपर्यंत.
- छाननी व माघार: दुपारी २:०० ते २:३० दरम्यान.
- निकाल: प्रक्रिया पूर्ण होताच तात्काळ घोषणा.
ग्रामविकास विभागाच्या आदेशानुसार, यंदाचे अध्यक्षपद 'सर्वसाधारण महिला' प्रवर्गासाठी आरक्षित करण्यात आले आहे. त्यामुळे महिला सदस्यांमध्ये मोठी चुरस पाहायला मिळत असून महायुतीसह सर्वच पक्षांच्या राजकीय हालचालींना वेग आला आहे. जिल्हाधिकारी किर्ती किरण पुजार या सभेचे पीठासीन अधिकारी म्हणून काम पाहणार आहेत.
जिल्ह्याची सूत्रे कोणाच्या हाती जाणार, याकडे आता संपूर्ण धाराशिव जिल्ह्याचे लक्ष लागले आहे.
टिप्पणी पोस्ट करा
0 टिप्पण्या